Composición da Xunta de Facultade

1. A xunta de centro é o órgano colexiado de representación e de decisión do centro.

Está composta pola decana ou decano, ou directora ou director, que a preside, e polo seguinte conxunto de membros adscritos ao centro:

• Todo o PDI-A.
• Unha representación do PDI-B.
• Unha representación do alumnado.
• Unha representación do persoal de administración e servizos.

O conxunto dos membros natos e electos deberá respectar de forma aproximada as seguintes porcentaxes de repartición: 51 % o PDI-A, 29 % o estudantado, 10 % o PAS e 10 % o PDI-B.

2. Son funcións da xunta de centro:

• Elaborar, aprobar e modificar a proposta do seu regulamento de réxime interno e doutros regulamentos de carácter organizativo considerados necesarios.
• Elixir e revogar a decana ou decano ou a directora ou director.
• Aprobar a proposta de distribución do orzamento anual do centro e a súa execución.
• Implantar e seguir os plans de estudos.
• Coidar do bo funcionamento de todos os órganos e servizos do centro.
• Preparar e coordinar, de modo eficaz e adecuado, o horario das distintas materias,cursos monográficos, cursos de especialización, probas parciais e finais, e a distribución de aulas e servizos e de ensinanzas complementarias.
• Habilitar medidas de control para cumprir as obrigas docentes.
• Distribuír os espazos que lle sexan asignados.
• Aprobar e executar o sistema de garantía de calidade.
• Aqueloutras que lle poidan atribuír estes estatutos e outra normativa vixente.

Estatutos da Universidade de Vigo